Një aksident i rëndë trafiku ka ndodhur në aksin rrugor Lezhë–Milot në Shqipëri, ku si pasojë ka humbur jetën një shtetas nga Kosova.
Sipas informacioneve të para, në aksident janë përfshirë një automjet dhe një kamion. Përplasja ka rezultuar fatale për drejtuesin e automjetit, i cili ka ndërruar jetë në vendin e ngjarjes si pasojë e plagëve të marra.
Nga aksidenti kanë mbetur të lënduar edhe dy persona të tjerë, të afërm të viktimës, të cilët janë transportuar për trajtim mjekësor dhe sipas autoriteteve ndodhen jashtë rrezikut për jetën.
Policia ka shoqëruar drejtuesin e kamionit për procedurat e nevojshme hetimore, ndërsa grupi hetimor po punon për zbardhjen e plotë të rrethanave dhe shkaqeve që çuan deri te aksidenti.
Autoritetet u bëjnë thirrje të gjithë pjesëmarrësve në trafik që të respektojnë rregullat e qarkullimit dhe të tregojnë kujdes të shtuar gjatë udhëtimeve, veçanërisht në segmentet me qarkullim të dendur dhe gjatë sezonit veror.
